N'alcordanza Carlos Redondo e Ígor Medio, 25-7-2026.

Incluyíu dientro de les actividaes del Festival Arcu Atlánticu celebróse ayeri vienres na Plaza Mayor de Xixón el conciertu n'homenaxe a Carlos Redondo y Ígor Medio, de que'l so murniu fallecimientu cumpliéronse 20 años el pasáu 24 de xunu. Podría falase d'un macroconcierto estremáu en dos partes, una de música folk, como homenaxe al legáu de Ígor como fundador, componente y compositor del grupu Felpeyu, al qu'hai qu'añedir el de Carlos, que se xuniría más tarde. La otra sería de música rock, centrándose nel legáu de Carlos como miembru del grupu Los Locos. 

Costaríame falar de los sentimientos atopaos de nostalgía, murnia y allegría, y de los momentos entrañables y risonderos que se vivieron ayeri, asina que me llimitaré a dexar equí xunes cuantes semeyes y vídeos.

La parte folk entamó a les cuatro de la tarde con Llan de Cubel, unu de los referentes del folk asturianu y coetáneu de Felpeyu.   

 

 

Dempués siguieron los Hermanos Castro, músicos gallegos que fueron cofundadores de Felpeyu. En parte de la so actuación cuntaron cola collaboración de Ruma Barbero, de Felpeyu, al bodhran, y Xel Pereda, de Llan de Cubel, a la guitarra.

 

La parte folk terminó cola actuación de Felpeyu, el grupu que del que foi cofundador Ígor Medio y al que dempués se xuniría Carlos Redondo. A la fin de l'actuación, xuniéronse a Felpeyu Llan de Cubel y los Hermanos Castro, y el fíu y la fía de Carlos Redondo.

 

La parte rock del conciertu entamó a les siete y media con Radio Fox, grupu asturianu que los sos miembros vienen de otres bandes pero que lleven años axuntándose n'ocasiones especiales para caltener el legáu de Los Locos faciendo versiones bien fieles pero al empar personales de les sos canciones. Paco Loco y el fíu y la fía de Carlos Redondo tamién se xunieron al grupu na actuación.

 

Tres Radio Fox vinieron Jaguares de la Bahía, grupu de Cádiz lideráu por Paco Loco, importante productor discográficu y músicu que formó parte de Los Locos con Carlos Redondo. 

 

Finalmente, el conciertu acabó pasaes les once de la nueche, tres más de seis hores de música, cola actuación de Kactus Jack, grupu esencial del Xixón Sound y del que forma parte Javier Rodríguez, gran amigu y collaciu d'Ígor Medio.